إلى أمهات وآباء شهداء المناصير، أحزانكم الليلة ملت البلد، فجيعتكم الليلة فجيعة كل سوداني، فجيعة كل أب وأم برسلوا أطفالهم للمدارس الصباح عشان يرجعوا ليهم أكبر و أطول، فجيعة كل طفل بحلم إنو يكبر و يبقى دكتور أو مهندس أو معلم، فجيعتكم فجيعتنا في حزب بناء السودان، الليلة حلقة جديدة في مسلسل فقد أطفال السودان المتواصل البعرّي كل الخطط والإستراتيجيات في السودان وبيظهر قبحها وكآبتها وللأسف الضحايا أولادكم، الليلة في حزب بناء السودان صورة أطفالكم وهم بغالبوا الموج جمدتنا في لحظة الحزن البدفعنا للتفكير ليه حصل كدا، ليه يتحول يوم عادي في حياة أطفال طبيعيين لكارثة استثنائية، ليه أبسط حقوق أطفالنا بتتحول لتراجيديا بتنهي حياتهم قبل ما تبدأ !
الليلة نحنا في حزب بناء السودان أحزانكم أحزانا وفجيعتكم فجيعتنا و بنتمنى انكم تتحلو بالصبر والقوة عشان تتجاوزو اللحظات المظلمة دي وبنتمنى ليكم السلام والطمأنينة وبنأكد ليكم إنو تضحياتكم ما حتضيع هدر و إنما حتكون شمعة حتنور طريق التغيير و أحزانكم حتبقى حافز إضافي لينا إننا نعمل لسودان أفضل بيلقى فيهو كل الأطفال حقوقهم بدون معافرة، فقد أطفالكم و أحزان قلوبكم هي دافعنا للتغيير، تقبلوا مننا كامل التضامن و منتهى التعزية في مصابكم و مصاب الوطن.